Creu Lleoedd Penarth
Gweithgaredd Creu Lleoedd ym Mhenarth
Mae'r tîm Cymunedau Creadigol yn arwain gweithgareddau Creu Lleoedd ar ran Cyngor Bro Morgannwg. Dechreuodd cyfarfodydd rhagarweiniol rhwng y tîm Cymunedau Creadigol a Chyngor Tref Penarth yn 2023 ac rydym wedi bod yn cyfarfod yn rheolaidd ers hynny i ddatblygu ein dull ar y cyd o ran Creu Lleoedd ym Mhenarth ac i gyflwyno Cynllun Creu Lleoedd ar gyfer y dref.
Dros y ddwy flynedd ddiwethaf, rydym wedi cwrdd â nifer o grwpiau cymunedol yn y dref, rydym wedi cwrdd â'r Fforwm Busnes ac rydym wedi bod o gwmpas yn cwrdd â thrigolion y gwahanol gymdogaethau ym Mhenarth. Rydym hefyd wedi cwrdd â Grwpiau Chwaraeon lleol, wedi cwrdd â disgyblion yn yr Ysgolion Uwchradd a Chynradd lleol ac rydym wedi gweithio gyda'n cydweithwyr yng Ngwasanaeth Ieuenctid y Fro i siarad â phobl ifanc sy'n mynychu gweithgareddau gwyliau'r haf yn y dref. Rydym hefyd wedi mynychu nifer o ddigwyddiadau cymunedol tymhorol a thrwy gydol y broses o ddatblygu'r Cynllun Creu Lleoedd, rydym wedi sicrhau bod cymaint o drigolion â phosibl o Benarth yn cael cyfle i rannu eu barn am sut beth yw byw ym Mhenarth, yn ogystal â'u syniadau am ba newidiadau y gellid eu gwneud i wneud Penarth yn dref gynaliadwy ar gyfer y dyfodol.
Llunio'r Cynllun Creu Lleoedd
Ym mis Medi 2024, cynhaliwyd digwyddiad galw heibio i drigolion a gweithdy gyda'r nos yn Ystafelloedd Paget i gasglu barn trigolion ar y themâu a oedd wedi dod i'r amlwg o'r gwaith ymgysylltu hyd at y pwynt hwnnw. Ym mis Hydref 2024, fe wnaethom benodi ymgynghorwyr Creu Lleoedd, Stride Treglown. Rydym wedi parhau i weithio gyda Stride Treglown, drwy gyfnod o ymgynghori manylach gyda rhai grwpiau rhanddeiliaid allweddol ledled y dref, a gyda'u harbenigedd proffesiynol a'u cymorth, rydym wedi creu Cynllun Creu Lleoedd ar gyfer y dref. Drwy gydol y broses, rydym wedi cydweithio'n agos â'r Cyngor Tref, gyda'r Cynllun Creu Lleoedd gorffenedig yn darparu offeryn gwerthfawr i'r ddwy lefel o Lywodraeth Leol i gefnogi datblygiad parhaus Penarth fel lle cynaliadwy i fyw, gweithio ac ymweld â hi.
-
Y Digwyddiad Lansio
Rhannu Y Digwyddiad Lansio ar Facebook Rhannu Y Digwyddiad Lansio Ar Twitter Rhannu Y Digwyddiad Lansio Ar LinkedIn E-bost Y Digwyddiad Lansio dolen
18 Medi 2025
Mae Penarth wedi lansio ei Chynllun Creu Lleoedd yn swyddogol, sy'n nodi cam mawr ymlaen wrth lunio dyfodol y dref.
Mynychwyd y digwyddiad lansio, a gynhaliwyd yn Turner House gan aelodau o'r gymuned ynghyd â Dirprwy Faer Penarth ac Arweinydd Cyngor Bro Morgannwg.
Pwysleisiodd y ddau arweinydd fod y lansiad yn nodi cam nesaf y broses Creu Lleoedd, gyda'r cam gweithredu i ddechrau ym mis Hydref pan fydd Bwrdd Tref Penarth yn cyfarfod am y tro cyntaf.
Oddi yno, bydd Timau Prosiect yn cael eu ffurfio i ddatblygu mentrau ledled y dref, gan ddefnyddio amrywiaeth o ffynonellau cyllid.
Dywedodd y Cynghorydd Laura Rochefort, Dirprwy Faer Cyngor Tref Penarth: "Hoffwn ddiolch i bawb a fynychodd lansiad ffurfiol y Cynllun Creu Lleoedd yn Turner House. Roedd y digwyddiad yn nodi dechrau cam nesaf Creu Lleoedd ym Mhenarth ac edrychwn ymlaen at weld sut mae'r cynllun hwn yn darparu cyfleoedd i Gyngor y Dref ac i'r nifer o grwpiau cymunedol ym Mhenarth fod yn rhan o'r broses ddatblygu."
Dywedodd y Cynghorydd Lis Burnett, Arweinydd Cyngor Bro Morgannwg: "Roedd yn wych gweld niferoedd mor dda yn lansiad y Cynllun Creu Lleoedd ym Mhenarth, ac mae'n adlewyrchu angerdd y gymuned dros wneud Penarth yn lle gwych i fyw.
"Mae creu lleoedd yn ymwneud â mwy na gwneud gwelliannau ffisegol yn unig - mae'n ymwneud â chreu lleoedd lle mae pobl yn teimlo'n gysylltiedig ac yn cael eu gwerthfawrogi. Rwy'n edrych ymlaen at weld sut y bydd syniadau'r gymuned yn helpu i lunio'r bennod nesaf i'r dref."
Mae creu lleoedd yn ddull sy'n canolbwyntio ar bobl, gyda’r nod o wneud trefi a mannau cymunedol yn fwy croesawgar, bywiog a phleserus i bawb.
Gall gynnwys popeth o welliannau seilwaith mawr i ddigwyddiadau diwylliannol a phrosiectau lleol bach, i gyd wedi'u cynllunio i gryfhau cysylltiad cymunedol ac ymdeimlad o berthyn.
Er y bydd rhai prosiectau yn cymryd amser i ddwyn ffrwyth, mae'r Cynllun Creu Lleoedd yn darparu map ffordd i sicrhau bod Penarth yn parhau i dyfu fel tref gynaliadwy a bywiog ar gyfer y genhedlaeth bresennol a chenedlaethau'r dyfodol.
-
Creu Lleoedd Penarth
Rhannu Creu Lleoedd Penarth ar Facebook Rhannu Creu Lleoedd Penarth Ar Twitter Rhannu Creu Lleoedd Penarth Ar LinkedIn E-bost Creu Lleoedd Penarth dolen
Roedd hi’n braf gweld cymaint o bobl yn ein digwyddiad Creu Lleoedd ym Mhenarth ddoe. Gallwch ddweud eich dweud o hyd drwy lenwi arolwg: https://cymrydrhan.valeofglamorgan.gov.uk/.../holiadur... a I gael y wybodaeth ddiweddaraf am gynnydd y cynlluniau, cofrestrwch yn: https://cymrydrhan.valeofglamorgan.gov.uk/ #creulleoeddpenarth #eichlleeichdweud #ystafelloeddpaget
