Prosiectau gwaith ysgol ac ieuenctid eraill

Ym mis Hydref 2023, cynhaliodd CyngorIeuenctid Bro Morgannwg ddigwyddiad Sgwrs Hinsawdd, yng Nghanolfan y Celfyddydau Memo, y Barri Daeth y digwyddiad â phobl ifanc o bob rhan o'r Fro ynghyd â rhai sy'n gwneud penderfyniadau i drafod eu profiadau o wastraff ac ailgylchu, a thrafnidiaeth, eu huchelgeisiau ar gyfer y dyfodol, a sut y gellid cyflawni'r rhain. Yn seiliedig ar yr adborth a gafwyd yn y digwyddiad, ymrwymodd y Cyngor i ymgymryd â nifer o gamau gweithredu yn 2024. Flwyddyn yn ddiweddarach, adroddodd y Cyngor a'r Gwasanaeth Ieuenctid ar gynnydd yr ymrwymiadau hyn. Mae Cyngor Ieuenctid Bro Morgannwg yn chwarae rhan bwysig wrth ymhelaethu llais pobl ifanc yn y Fro ac maent wedi rhoi adborth gwerthfawr ar brosiectau amrywiol gan gynnwys Prosiect Zero. Dim ond un o'r ffyrdd y mae'r grŵp wedi bwydo i raglen waith Prosiect Zero yw'r digwyddiad Sgwrs Hinsawdd.