Cwestiynau Cyffredin

Mae Cyngor Bro Morgannwg yn paratoi Cynllun Datblygu Lleol Newydd (CDLlN). Bydd y CDLlN yn cwmpasu'r cyfnod 2021-2036 a bydd yn cymryd lle CDLl mabwysiedig 2011–2026. Bydd y CDLlN yn nodi ble a sut y bydd datblygiadau newydd yn digwydd yn y Fro yn y cyfnod hyd at 2036.  Bydd yn cynnwys dyraniadau safle ar gyfer gwahanol ddefnydd o dir, fel tai a chyflogaeth, a pholisïau i helpu i fynd i'r afael â'r argyfyngau hinsawdd a natur sydd wedi cael eu datgan, diogelu'r amgylchedd, a sicrhau dyluniad o ansawdd uchel. Pan gaiff ei fabwysiadu gan y Cyngor, bydd y CDLlN yn cael ei ddefnyddio fel sail ar gyfer penderfynu ceisiadau cynllunio. Mae'r CDLlN yn cael ei baratoi yn unol â chytundeb cyflawni diwygiedig: Cytundeb Cyflawni 2026 

Mae'r CDLlN yn cael ei baratoi gan yr Awdurdod Cynllunio Lleol. Mae nifer o gamau i baratoi'r Cynllun a gwahanol gamau ymgynghori a chynnwys pobl wrth ei baratoi.  Cyn dechrau gweithio ar y CDLl, gwnaethom lunio Cytundeb Cyflawni sy'n nodi amserlen y CDLl a phryd a sut y gallai pobl gymryd rhan.  Wrth baratoi'r CDLl, byddwn yn adeiladu sylfaen dystiolaeth i lywio a chefnogi'r Cynllun.

Mabwysiadwyd y CDLl presennol yn 2017 ac mae'n cynnwys amserlen 15 mlynedd hyd at 2026.   Bydd y CDLl mabwysiedig yn dod i ben ar ddiwedd 2026 ac felly mae'n hanfodol ei fod yn cael ei ddisodli i ddiogelu rhag datblygiadau annerbyniol. Bydd y CDLlN yn darparu cynllun datblygu, a'r sicrwydd y mae hyn yn ei roi i gymunedau a datblygwyr am y cyfnod hyd at 2036.

Cynhaliwyd ymgynghoriad cyhoeddus rhwng Rhagfyr 2023 a Chwefror 2024 ar y Strategaeth a Ffefrir ar gyfer y CDLlN, cyn iddi gael ei chytuno gan y Cyngor llawn ym mis Medi 2024 i ffurfio sail y CDLlN Adneuo.  Yn dilyn hyn, cynhaliwyd ymgynghoriad anstatudol rhwng Mehefin a Gorffennaf 2025, i ymgynghori ar safleoedd newydd yn y Barri i ddisodli safle allweddol o'r Strategaeth a Ffefrir na ellid bwrw ymlaen ag ef mwyach oherwydd pryderon o ran y gallu i’w gyflawni. Cymeradwywyd y safleoedd hyn gan y Cyngor Llawn ym mis Rhagfyr 2025 i'w cynnwys yn y Cynllun Adneuo. 

Mae'r CDLlN bellach ar gam y Cynllun Adneuo. Y Cynllun Adneuo yw'r ail gam ymgynghori cyhoeddus statudol yn y broses o baratoi'r CDLlN. Rydyn ni’n ymgynghori'n gyhoeddus ar y Cynllun Adneuo o 28 Ionawr 2026 i 11 Mawrth 2026.  

Y Cynllun Adneuo yw’r cam ffurfiol nesaf yn y broses o baratoi’r cynllun datblygu. Mae'n ehangu ar y Strategaeth a Ffefrir, y gofynnom am eich barn arni rhwng Rhagfyr 2023 a Chwefror 2024. Mae'r Cynllun Adneuo yn nodi manylion y Strategaeth gyffredinol, polisïau datblygu, ardaloedd i'w gwarchod, a dyraniadau tir penodol ar gyfer datblygu (gan gynnwys tai newydd, cyflogaeth) dros y cyfnod o 15 mlynedd.   Mae wedi cael ei lywio gan sylfaen gadarn o dystiolaeth, gan gynnwys cyfres o bapurau cefndir ac adroddiadau ategol, yn ogystal ag Arfarniad Cynaliadwyedd Integredig (ACI).

Mae'r Cynllun Adneuo yn gwneud darpariaeth ar gyfer 8,660 o gartrefi newydd dros gyfnod o 15 mlynedd, i fodloni gofyniad o 7,890 o gartrefi newydd neu 526 y flwyddyn.  O'r cartrefi newydd hyn, bydd o leiaf 3,070 o gartrefi fforddiadwy yn cael eu darparu. Mae'r cynllun hefyd yn dyrannu 182 hectar o dir cyflogaeth i alluogi darparu 5,338 o swyddi newydd. 

Nage, nid y Cynllun Adneuo yw'r CDLlN terfynol. Y Cynllun Adneuo yw'r fersiwn lawn ddrafft o'r CDLlN sy'n cwmpasu Bro Morgannwg yn ystod y cyfnod 2021-2036. Mae angen mwy o gamau cyn y gall y Cyngor fabwysiadu'r Cynllun Adneuo, gan gynnwys ei gyflwyno i Lywodraeth Cymru ac archwiliad annibynnol. Mae rhagor o wybodaeth am y camau nesaf ar ôl yr ymgynghoriad ar y Cynllun Adneuo ar gael o dan y cwestiwn 'Beth sy'n digwydd ar ôl yr ymgynghoriad?'

Ni ellir dyrannu safleoedd yn ffurfiol nes bod fersiwn derfynol y CDLlN yn cael ei fabwysiadu gan y Cyngor. Fodd bynnag, mae'r Cynllun Adneuo yn cynnig dyrannu 5 safle tai allweddol newydd a fydd yn cael eu dyrannu yn y CDLlN sy'n dod i gyfanswm o 2,278 o unedau, yn ogystal â 9 dyraniad tai arall sy'n dod i gyfanswm o 1,120 o unedau, 4 safle gwledig a arweinir gan dai fforddiadwy (safleoedd lle bydd o leiaf 50% o gartrefi newydd yn fforddiadwy) sy'n dod i gyfanswm o 122 o unedau, ac 1 cyfle ailddatblygu a arweinir gan dai. Mae hefyd yn nodi 5 prif safle banc tir (safleoedd sydd eisoes â chaniatâd cynllunio, neu lle mae penderfyniad i roi caniatâd cynllunio yn amodol ar lofnodi cytundeb Adran 106) sy'n gyfanswm o 1,124 o unedau.

Mae'r Cynllun Adneuo hefyd yn nodi tir ar gyfer cyflogaeth fawr a chyflogaeth leol, sydd wedi'u nodi o dan Bolisi SP14.  Mae tir a nodwyd ar gyfer cyfleoedd adfywio cyflogaeth wedi'i nodi o dan Bolisi EMP1. 

Gellir dod o hyd i safleoedd y bwriedir eu dyrannu ar gyfer datblygu yn y map rhyngweithiol: https://valeofglamorgan.oc2.uk/cy/ 

Os hoffech chi wneud sylwadau ar y dogfennau ymgynghori, llenwch y ffurflenni sylwadau perthnasol. Mae'r Cyngor yn annog cyflwyno sylwadau'n electronig drwy ei borth ymgynghori ar-lein yn https://valeofglamorgan.oc2.uk/cy/, ond bydd ffurflenni sylwadau a gyflwynir drwy'r post neu e-bost hefyd yn cael eu derbyn. Gellir lawrlwytho ffurflenni sylwadau o wefan y Cyngor neu maent ar gael yn y lleoliadau uchod. Gellir anfon ffurflenni wedi'u llenwi drwy e-bost at ldp@valeofglamorgan.gov.uk neu eu postio i Polisi Cynllunio, Cyngor Bro Morgannwg, Swyddfeydd Dinesig, Heol Holltwn, Y Barri, Bro Morgannwg CF63 4RU.

Rhaid derbyn pob sylw erbyn 23:55 ddydd Mercher 11 Mawrth 2026. Ni ellir ystyried unrhyw sylwadau a ddaw i law ar ôl yr adeg hon. Bydd sylwadau sy'n cael eu gwneud a'u cyflwyno'n briodol o fewn y cyfnod ymgynghori penodedig yn cael eu cydnabod a'u hadrodd yn y modd priodol i'r Cyngor iddo’u hystyried. 

Rydych chi'n cael eich gwahodd i wneud sylwadau ar y dogfennau canlynol: 

• Dogfen yr Ymgynghoriad ar y Cynllun Adneuo 
• Arfarniad Cynaliadwyedd Integredig  
• Asesiad Rheoliadau Cynefinoedd
• Canllaw Cynllunio Atodol (CCA) ar Greu Lleoedd Iach
• Strategaeth Seilwaith Gwyrdd 

Cyhoeddwyd sawl dogfen ategol hefyd i gefnogi'r ymgynghoriad ac amlinellu'r dystiolaeth y mae'r Cyngor wedi'i hystyried wrth baratoi'r Cynllun Adneuo. 

Bydd yr ymgynghoriad yn fyw am 6 wythnos o 28 Ionawr 2026 i 11 Mawrth 2026.

Mae'r CDLl Adneuo a'r holl ddogfennau cefndir perthnasol ar gael i'w gweld ar borth ymgynghori'r Cyngor (https://valeofglamorgan.oc2.uk/cy/) ac yn y lleoliadau Adneuo canlynol yn ystod oriau agor arferol: 

• Swyddfeydd Dinesig, Heol Holltwn, y Barri, CF63 4RU 
• Holl lyfrgelloedd y Cyngor 

Mae dogfen hawdd ei darllen wedi'i pharatoi, sy'n darparu fersiwn fyrrach a symlach o brif ddogfen ymgynghori'r Cynllun Adneuo. Bydd y Cyngor hefyd yn cynnal cyfres o sesiynau ymgysylltu wyneb yn wyneb lle bydd gwybodaeth am y Cynllun Adneuo a sut i wneud sylwadau ar gael. Bydd y sesiynau hyn yn cael eu cynnal yn ystod mis Chwefror 2026. Mae gwybodaeth am ddyddiad, amser a lleoliad y sesiynau hyn ar gael ar dudalen we’r Cyngor yn: https://www.valeofglamorgan.gov.uk/cy/living/planning_and_building_control/Planning/planning_policy/RLDP/Replacement-Local-Development-Plan.aspx 

Er mwyn dangos bod yr ymgynghoriad wedi'i gynnal yn briodol, mae'r Cyngor yn bwriadu cyhoeddi'r ymatebion i'r ymgynghoriad hwn.  Cyhoeddir enw'r person neu'r sefydliad a anfonodd yr ymateb gyda'r ymateb.   Oherwydd hynny, ni allwn dderbyn sylwadau dienw. 

Bydd gwybodaeth yn cael ei chadw a'i chyhoeddi yn unol â pholisi preifatrwydd y Cyngor:  Cyngor Bro Morgannwg / Vale of Glamorgan Council - Preifatrwydd 

Bydd y sylwadau a dderbynnir yn cael eu hystyried fel sylwadau ffurfiol i'r Cynllun Adneuo (neu ddogfennau eraill yr ymgynghorir arnynt), gan lywio cynnwys y cynllun a fydd yn cael ei gyflwyno i Lywodraeth Cymru i'w archwilio. Bydd y Cyngor yn ystyried ac yn dadansoddi'r sylwadau a wnaed a bydd yn cyhoeddi ymatebion i'r rhain lle bo hynny'n briodol.  Mae'n bwysig nodi na ellir trin sylwadau a dderbynnir yn gyfrinachol ac felly byddant ar gael i'w harchwilio gan y cyhoedd.

Ar ôl i’r ymgynghoriad ddod i ben, bydd y Cyngor yn ystyried yn ofalus yr ymatebion a ddaeth i law. Bydd yr adroddiad ar yr ymgynghoriad yn cael ei baratoi, a fydd yn nodi pwy yr ymgynghorwyd â nhw, y prif faterion a godwyd a sut y bydd y sylwadau hyn yn dylanwadu ar gam nesaf y gwaith o baratoi'r cynllun. Bydd yr adroddiad ar yr ymgynghoriad yn cael ei ystyried gan y Cyngor llawn yn ddiweddarach yn 2026.  Yn dilyn hyn, mae angen cyflwyno'r Cynllun i Lywodraeth Cymru a fydd yn trefnu i Arolygydd Cynllunio annibynnol gael ei benodi i gynnal archwiliad cyhoeddus.  

Yn dilyn yr archwiliad bydd yr Arolygydd yn cyhoeddi adroddiad yn argymell newidiadau sydd angen eu gwneud i'r CDLlN. Os yw'r Arolygydd o'r farn nad yw’r Cynllun yn gadarn yn sylfaenol, ni fydd yn cael ei argymell i'w fabwysiadu. Bydd casgliadau'r Arolygydd yn derfynol ac oni bai bod Llywodraeth Cymru yn ymyrryd, bydd y Cyngor mewn sefyllfa i dderbyn y newidiadau a mabwysiadu’r CDLlN fel y’i diwygiwyd. Ar ôl ei fabwysiadu, bydd y CDLl Newydd yn disodli'r CDLl presennol a fabwysiadwyd yn 2017 a dyma fydd y fframwaith ar gyfer gwneud penderfyniadau ar geisiadau cynllunio.